Mutima Constantin n’abandi barundi bakunda Uburundi

 

 

 

ICEGERANYO C’INAMA (CONFERENCE) IJANYE N’UGUTEZA IMBERE UMUPIRA W’AMAGURU MU BURUNDI

I) INTANGAMARARA

Kw’i genekerezo rya 19/02/2011, umugwi w’Abarundi n’incuti z’Uburundi bararemesheje ikiganiro kijanye n’ingene umukino w’amaguru mu Burundi wifashe, wogarukirwa ukongera  ugatezwa imbere.

Inama yuguruwe icese yongera irongorwa n’umushingantahe arongoye C.B.C (rimwe mu makoraniro makuru y’Abarundi baba muri Coventry, West Midlands muri Angleterre). Inama yabereye mu bigo vya Saint Peters Centre, Hillfields, Coventry. Yuguruwe isaha 19:00 isozerwa isaha 20:00. Abitavye iyo nama y’intangamarara bari icenda bose hamwe.

Amaze gushimira abitavye ubutumire, Umushingantahe Freddy Nikiza arongoye C.B.C yibukije ko inkino zihambaye kw’isi yose. Ku bwiwe, ingene inkino mu Burundi zifashe muri iki gihe vyasaba ko inama nkiyo yoba kugira higwe ingene hoterwa intambwe mw’iteramabere ry’inkino na cane cane football. Yabandinije avuga ko football n’inkino vyateje imbere cane izina ry’Uburundi mu makungo no kuramura abahinga b’inkino ku ma soko mpuzamakungu(exportation des/export of talents). Aha yatanze akarorero ka Venuste Niyongabo mu mahiganwa ya  Atlanta 1996 tutibagiye uruhara imirwi ya football yagize mu mahiganwa ya C.A.F na F.I.FA .

Amaze guca ku masonga ingene inkino zifashe i Burundi, Umushingantahe F.Nikiza yaciye atomora intumbero y’inama: Kwiga ingene n’ico abitavye boterera mu majembere y’inkino na cane cane football y’Uburundi. Yamenyesheje abari aho ko benshi mu batumire batashoboye kuza kubera imvo zitandukanye. Hazoba izindi nama mu nyuma.

Imbere ko ashikiriza ijambo abandi batumire, abari ngaho bararonse akanya ko kwidondorana no kwakira abashitsi bari baje bava i Birmingham, West Midlands, muri Angleterre nyene. Abo nabo bari Abashingantahe Ernest Ndayishimiye na Armand Afumba.

 

II) GUHANANA IVYIYUMVIRO

Iki gice c’inama cuguruwe n’Umushingantahe Constantin Mutima ajejwe inkino n’umuco muri C.B.C.

Yatanguye nawe kwifuriza ikaze abashitsi n’abatumire. Yavuze ko naho abatumire bose batashoboye kuza uwo musi yizeye cane ko benshi kuruta bazoboshora kwitaba inama zizokurikira.

Amaze kwidondora (realisations personnelles/personal achievements), yameshejeje abatumire ko intumbero y’inama atari kwisuka mu bikorwa vya F.F.B canke izindi nzego zijejwe inkino i Burundi. Icifuzo nyamukuru kwari ugushigikira football mu buryo bw’amafaranga canke imigambi yindi yoba isa gutyo.

Yatanze akarorero ku kuntu umurwi w’Intamba uriko uragira ingorane zikomeye mu gutegura urukino ruzobahuza n’Urwanda mu mahiganwa ya C.A.F. Yavuze ko amatwi amusumira ukwitegura kw’Intamba kwoba ataho guhuriye n’imyiteguro y’Amavubi y’Urwanda. Urukino rwa nyuma Intamba zakinye zaruhuje na Cote d’Ivoire haheze imisi myinshi cane.

Ariko rero naho yatanze ako karorero yabandinije yibutsa ko itunganywa rya F.F.B atarico cari kiraje ishinge inama. Ico abatumire basabwe ni ukwiga ingene hoba icegerenyo c’ingene football yagiye itera imbere canke isubira inyuma (evaluation critique/critical assessment), ingene ibintu vyogororwa canke bigakomezwa hanyuma hakaba na rapport/report yotangwa i Burundi n’ahandi kuvyo inama yashitseko.

 

Itohoza kw’iterambere rya football muri kahise kugeza ubu (analyse critique/critical assessment):

Abatumire bamaze gufata ijambo, ivyiyumviro mvinshi vyaratanzwe. Bamwe mubatanze ivyiyumviro barakoreye football mu Burundi. Aho twovuga Abashingantahe Constantin Mutima na Pascal Niyonkuru. Umushingantahe Mutima yakiniye Dynamique anafise diplome y’Umumenyereza (Entraineur/Coach),Niyonkuru nawe yakoreye Vital’o F.C kugeza ku rwego rw’Umunyabanga Mukuru (Seceretaire General/General Secretary). Mubandi batumire baraho nabo benshi bakurikiranira hafi cane ivy’umupira w’amaguru canke mbere bafise imigenderanire ikomeye n’abayobozi  muri urwo rwego. Hatanzwe ivyiyumviro mu nzego zikurikira:

a) Ingorane: 

Abatumire bamaze guhanahana ijamabo n’ivyiyumviro basanze football  y’Uburundi imaze imyaka myinshi cane. Mugihe imaze, intambwe zimwe zarashoboye guterwa. Naho umurwi w’igihugu w’abakuze (seniors) utarashobora kuja mw’ihiganwa rya nyuma (phase finale/ final stage) rya Coupe d’Afrique/African Cup, vyarabonetse ko Uburundi bwari hafi cane mu myaka ya 1990-2000. Umugwi w’ugihugu w’imiyabaga warashoboye kugera muri finale ya Coupe d’Afrique/ African Cup muri 2005 imbere yo guserukira Uburundi na Africa mu gikombe c’isi yose i Qatar.

Mu rwego rw’imigwi (clubs) naho nyene abatumire basanze harabaye intamwe ikomeye mu kiringo ca 1990-2000 aho imugwi Vital’o washika muri finale y’ihiganwa rya C.A.F ry’abatsindiye ibikombe muri 1992. Incuro nyinshi, imigwi ya Vital’o na Inter zashitse muri ¼ na ½ y’amahahiganwa ya C.A.F. Uburundi bwaragize abakinyi bakomeye nka ba Malik, Stanley, Juma Mosi na Nonda n’abandi bashoboye no guserukira igihugu mu makungu, ku rwego rwaba professionnels/professionals, mu bihugu umupira uteye imbere cane.

Ariko, abatumire basanze akabi k’intambara n’umutekano muke vyasubije cane umupira w’amaguru cane cane ku rwego rw’abakiri bato (pepiniere/grassroot). Ivyo biri mu vyatumye umupira, championat/championship zibura abakinyi b’inkerebutsi mu myaka yakurikiye intambara n’umutekano muke.

Vyongeye, abatumire basanze kandi itunganywa ry’imigwi (finances des clubs/club finances) zisunze cane kuva kera amafaramga ava muma higanwa ya C.A.F. Inkurikizi y’ivyo n’uko imigwi idashoboye kuja hanze agira ingorane nini cane kuronka amafaranga y’ugukora (budgets) hamwe rero n’ukuronka abakinyi beza.

Mu myaka iheze, F.I.F.A yaratanze uburyo bwinshi cane bwo gufasha umupira. Naho abatumire bemeye ko amafaranga ari ngirakamaro, basanze ku bijanye n’Uburundi, abategetsi benshi b’imigwi batavyifashemwo neza cane ku buryo hari n’abavuga ko ayo mahera yoba yateye akageso ko gukunda no kurondera amaronko imbere y’urukundo rw’umupira n’abakinyi. Abatumire basanze ibivugwa ko inyota y’amafaranga yononye umupira bifise canke vyoba bifise ishingiro rinini.

Abatumire barihweje kandi n’ikibazo c’ikurikiranwa ry’abakinyi bo hanze y’Uburundi. Basanze harimwo ingorane nyinshi kuko usanga ibiganiro (liaison) hagati y’abakinyi (n’imiryango yabo rimwe na rimwe), imiwri bakinira na F.F.B bigoye. Abana bakurira kandi bakinira hanze bakenera kwiyumvamwo Uburundi kuburyo bohitamwo kubukinira nk’uko nkaba Didier Drogba bahisemwo Cote d’Ivoire kandi yakuriye mubu Faransa (France). Ku bw’abatumire, n’ibisanzwe ko igikorwa co gukundisha abana bo hanze  igihugu c’abavyeyi babo kigora mu gihe Abarundi babana hafi canke ambassade/embassy batabigiyemwo.

 

b) Imwe mu miti yatowe:    

Bamaze guhana ijambo n’ivyiyumviro, abatumire basanze umupira wo hasi, mu bana b’Uburundi, mu mihingo yose bikwiye kugarukirwa.

Harakwiye ko abana bokwigishwa gukunda igihugu biciye mu mupira w’amaguru.

Mu kwita kw’iterambere (developpement des talents/talent development) y’abana canke imiyabaga, abakozi bohimirizwa ku neza rusangi abakinyi bazanira izina rw’Uburundi iyo bateye imbere. Bokwibutswa kenshi bikwiye ko uretse izina ryiza, iterembere ry’abakinyi rizanira amajambere igihugu, bikagabanya ubukene na cane cane uravye imfashanyo bamwe bu bakinyi beteye imbere bama baha ibihugu nko mukwubaka amashure n’ibindi.

Abakozi na bene imirwi bakwiye guhimirizwa bihagije kandi bibereye kwirinda amaronko adafadika na cane cane kwishinga gusamarira uburyo bwa F.F.B. Imigwi yohimirizwa ku buryo kijambere bwo kurondera imitahe (mobilisation des capitaux/capital raising) aho kwishinga gutega amaso amahiganwa ya C.A.F canke imfashanyo za F.I.F.A. Ivyo bizosaba kwigisha ko akigoro ka mbere ari ngombwa. Amahera ava mw’iterambere n’igurishwa rya licences z’abakinyi hamwe n’iterambere mu gutunganya imirwi (strategie technique, financiere et commerciale / technical, financial and commercial strategy) bizotuma imirwi yigenga hanyuma vyongereze amajambere rusangi (niveau general level) no gukorakoza guke (moins de tendance a la corruption/less tendency towards corruption).

Gukorana hagati y’Abarundi canke imihari yabo, ambassades na F.F.B bizotuma igihugu kimenya urwaruka rukina neza umupira hakiri kare, kubakurikirana no kubakundisha Uburundi. Birakenewe ko imigwi nk’iyi yotera imbere hirya no hino, igakorana na ambassades, F.F.B, ikanafasha aho bikenewe kandi F.F.B ivyemeye mu gushikira umirwi abo kinyi bo hanze boba bakinamwo. Vyoba ari abikorwa ntangere kuri F.F.B imirwi nkatwe ishoboye kuba amaso n’ibirenge yabo aho bishoboka kandi vyumvikanyweko.

 

III) IMIGAMBI NO GUSOZERA:  

Abatumire bamaze kwihweza ivyo vyose kandi babonye ko igikorwa batanguye gihimbaye, biyemeje bose:

1) Gushinga urwego (structure/setting) rwokwiga ishiraho ry’ishirahamwe rijejwe kugarukira no guteza imbere umupira w’amaguru w’Uburundi.

2) Ko umurwi w’abashingantahe bane borongora igikorwa ntangamarara co kwiga no kuyobora ibikorwa bijanye no gushiraho iryo shirahamwe.

3) Abo bashingantahe batowe kandi bakizerwa na bose ni: President: Ernest Nshimirimana arongoye abandi bizigirwa batatu: Constantin Mutima, Freddy Nikiza na Pascal Nkurunziza

4) Gufata mu mungongo igikorwa kigiye gukurikira gushika ku nama zizokurikira, mu gutanga intererano komite izoshinga.

5) Gusubira guhura mu nama rusangi izohamagagwa kw’itariki 23/04/2011. Iyo nama izohuza abo bose bifuza kuja muri uyu muhari kandi vyose bizokorwa ngo abantu bose bashobora gushikirwa bararikwe kandi batumirwe.

 

 

Bikozwe kuwa 19 Ruhuhuma 2011

St Peters Centre, Hillfields

 Coventry, West Midlands,

 Royaume-Uni / United Kingdom

 

 

Meeting on revival of Burundian Football

 

Dear Sirs,

Please find a copy of the interim minute (Kirundi version)of the Conference on Burundian football. French and English versions will follow in about two days. Please report back any corrections or additions as soon as possible.

You will also have received (for internal networking) an e-mail with a list of participants to the said conference together with their telephone details. It would be appropriate to remind you to use that personal information in a responsible manner. This generally means that it should only be dislosed to external people with explicit permission of the concerned individuals.

I bring to your attention that certain participants did not give their e-mail address (Freddy Nikiza) or gave incorrect or incomplete addresses (Richard Niyokwubahwa and Georges Buyoya). If you wish to pass to them this communication, please talk to them directly by telephone speak to Mr Constantin Mutima.